Наместо утре, пратениците во среда ќе расправаат за одземање на мандатот на пратеникот Никола Груевски. Како што стои на собранискиот сајт, Комисијата за мандатно имунитетни и деловнички прашања ќе заседава на 07.10.2018, ден пред можното заминување на Груевски на отслужување на затворската казна.
Предлог за одземање на мандатот на пратеникот Никола Груевски е врз основа на добиено Известување од Основен Суд Скопје 1 Скопје, Одделение за организиран криминал и корупција за пресуда со која пратеникот е осуден на казна затвор во траење од две години. Еден од условите за одземање на мандат за пратеник е доколку неговите колеги одлучат дека тој не е достоен да ја врши пратеничката функција. Според сегашното изјаснување на пратениците, тешко ќе оди оваа постапка, бидејќи за одземање на мандатот треба 80 пратенички гласови. Новата пратеничка група на ВМРО-ДПМНЕ и коалицијата веќе се изјасни дека нема да го поддржи одземањето на мандатот на нивниот долгогодишен лидер.
Токму оваа пратеничка група е иницијатор на формирање на тело за помирување кое ќе се договара утре кај спикерот Талат Џафери. Неизвесно е дали на координацијата ќе присуствува новиот координатор на ВМРО-ДПМНЕ.