Во кумановската библиотека „Тане Георгиевски“ денеска се одржа 16-тиот општински натпревар „Млад Библиотекар“. На натпреварот, што се организира во рамки на одбележувањето на Месецот на книгата, учествуваа ученици од сите 16 основни училишта од градот, кои имаа можност да го покажат своето знаење од областа на библиотекарството. Победникот ќе ја претставува општината на републичкиот натпревар кој ќе се одржи на 16 ноември во Демир Хисар.
-Во насока на популаризација на книгата, по повод месецот на книгата што се одбележува од 15-ти октомври до 15-ти ноември библиотеката организира и литературен и ликовен натпревар, изјави директорот на библиотеката, Марјан Петковски.
Надлежните од библиотеката нагласија дека се задоволни од знаењето што го покажуваат учениците. Тие се надеваат дека кумановци и оваа година, како и претходните ќе постигнат високи резултати и на државниот натпревар.
Во рамки на одбележување на Месецот на книгата кумановската библиотека организира повеќе настани во насока на промоција и популаризација на книгата и читањето, меѓу нив промоции на книги, литературни средби со писатели, работилници со ученици.
Со книжен фонд од 200.000 примероци, кумановската библиотека е меѓу најдобро снабдените во земјава.
