Кумановското основно училиште „Кочо Рацин“ доби два проекти од ЕРАЗМУС+ програмата Клучна акција 2: Соработка за иновација и размена на добри практики, информираа денеска од надлежните од училиштето.
Како дел од од ЕРАЗМУС + програмата наредните две учебни години, училиштето ќе соработува со десет училишта на два Еразмус + проекти, со Франција, Португалија, Шпанија, Италија (Сицилија) и Романија на проектот GOAL! (Games of a Lifetime!) – „Учиме преку игри“, како и со училишта од Шпанија, Италија (Сицилија), Романија, Полска и Хрватска на проектот ESCEI (European Scholar Congress on Environmental Issues) – „Европски научен конгрес за животна средина и екологија“.
– Основните цели се соработка за иновација во наставата и размена на добри искуства и практики. Учениците и тимовите на наставници ќе имаат можност да разменат искуства, да се стекант со нови вештини и знаења. Чест ни е што два пати ќе бидеме домаќини на наставници и ученици од сите партнер училишта, изјави координаторот на двата проекти, Анита Димовска, наставник по англиски јазик.
Проектот GOAL! (Games of a Lifetime!) – „Учиме преку игри“ ќе се спроведува две години, а почнал од почетокот на учебната година. Целта на проектот е да се подобрат постигнувањата на учениците со учење преку игри, како и да се споделат идеи и нови игри за да се подобри наставниот процес и да се збогатат наставните практики во сите партнер училишта и пошироко.
Проектот ESCEI (European Scholar Congress on Environmental Issues) -Европски научен конгрес за животна средина и екологија“ започна да се спроведува од први октомври и ќе трае нарените две години.
– Во тек се подготовките на училишниот тим за првата средба и обука во Барселона, Шпанија, што ќе се реализира следната недела, изјави Димовска.
Целта на овој е да се развие и подигне еколошката свест кај учениците, родителите и локалната заедница, како и да се изнајдат соодветни решенија за проблемите и предизвиците при одржување еколошки и здрава животна средина.