Владејачката ВМРО-ДПМНЕ вечерва во големата сала на НУ Центар за култура-Битола го промовираше градоначалникот Владимир Талески за трет континуиран мандат во овој град.
Одлуката за номинирање на Талески за прв човек на општина Битола ВМРО-ДПМНЕ ја донеле затоа што политиката не се состои од зборови туку од дела, истакна претседателот на ОК на ВМРО-ДПМНЕ во овој град, Зоран Илиоски.
– Нашиот Владимир Талески неуморно работи меѓу граѓаните и со граѓаните, нашата Битола осум години е во добри раце, со дела кои зборуваат сами за себе. Градоначалникот Талески покажа и докажа дека има визија за Битола, но и тим што знае таа визија да ја претвори во реалност. Граѓаните му веруваат во секоја прилика и затоа уверени сме дека на претстојните локални избори довербата ќе биде потврдена, истакна Илиоски.
На вечерашната промоција во Битола пред присутните преставници на раководството на ВМРО-ДПМНЕ, претставници на Владата и Собранието на Република Македонија, Универзитетот „Св.Климент Охридски“, верските заедници, почесните конзули, градоначалници и советници од пелагонискиот регион, градоначалникот Владимир Талески потсети на меѓусебната поддршка во изминатиот период и резултатите кои произлегуваат од заедничкото работење и институционалната соработка.
– Ветувањата ги исполнивме. Битола станува успешна приказна. Во индустриската зона „Жабени“ имаме 29 инвеститори, а се евидентирани и првите 200 нови вработувања. Во наредните четири години ќе продолжиме со континуираните проекти, а имаме и нови како што е проектот топлификација на Битола за кој имаме владина и поддршка од ЕЛЕМ. Но, во овој мандат ќе биде реализиран и завршен и проектот за гасификација на Битола, истакна Талески.
Според него поддршката за трет мандат од битолчани е очекувана и е резултат втемелен на постигнувањата во изминатиот период во сите сегменти што се од надлежност на локалната самоуправа.
– Ќе завршиме со изградбата на современиот и според европски стандарди старски дом „Сју Рајдер“-Битола, ќе изградиме четири нови детски градинки, а во соработка со МПЦ ќе изградиме прекрасен Храм за заштитникот светец на нашиот град „Св.Нектариј Битолски“. Ќе има и други проекти, спортски сали, нови и реконструирани училишта, како и други важни капитални проекти што ги предложиле граѓаните а се дел од изборната програма на ВМРО-ДПМНЕ, посочи Талески.