Централниот одбор на ДОМ ја потврди одлуката на Извршниот одбор за самостоен настап на локалните избори 2013.
Како што соопшти денеска претседателката на партијата Лилјана Поповска, ДОМ ќе има околу 40 советнички листи, традиционално коалициски ќе настапи во неколку општини Чаир, Гостивар, Кичево, а ќе води максимално позитивна кампања со промоција на сопствената „зелена програма“.
– Ќе настапиме самостојно, со советнички листи на ДОМ. Листата за градоначалници ќе ја поддржиме коалициски. Со колегите од ВМРО–ДПМНЕ сме задоволни што постигнавме согласност околу тоа. Веруваме дека ова ќе биде најдобар начин за промоција на зелената опција и од друга страна, ќе биде наша можност за натамошно приближување до Европските зелени партии, рече Поповска на прес-конференција.
Според неа, ДОМ ќе промовира политичка култура на толеранција, разум и одмереност.