Вкупно четириесетина ученици од селата од кумановско и од општините Кратово, Крива Паланка и Старо Нагоричане поднеле барање за прием во ученичкиот дом „Професор Мијалковиќ” во Куманово, информираа денеска од образовната установа. Учениците кои се запишале во првиот и вториот уписен рок, ќе се сместат на почетокот на учебната година.
Установата е подготвена за почеток на учебната година за прием и сместување на учениците кои одбрале да учат во една од насоките на петте средни училишта во градот, објаснуваат надлежните.
– Секоја година се намалува бројот на ученици во средните училишта, а со тоа и интересот за прием во ученичкиот дом, изјави, директорката Љубица Павловски.
Условите за изведување на настава и домување ги задовуваат потребите на учениците, оценуваат надлежните. Интернатот располага со библиотека, кабинети и простор за рекреација. Учениците добиваат и поддршка од професори за дополнителна настава по предмети за кои имаат потреба.
Сместувањето на учениците во ученичкиот дом го финансира Министерството за образование. Проектираниот капацитет на „Професор Мијалковиќ” во Куманово е 120 ученици.