Премиерот Зоран Заев лошите позиции на Македонија на светските листи за иновативност и корупција ги препиша на политичката криза во државата. Ѓорчев рече дека е брука, адвокатот на Заев да го вади од притвор градоначалникот на Ново Село кој доби казна од 18 месеци за шверцување на цигари. Заев на ова одговори дека градоначалникот е негов личен пријател ама ќе си одговара, а тоа ќе биде за пример на другите.
„Се обидуваме да ги унапредиме позициите. Не очекувам падови на позициите за 20 места. Борбата против корупцијата е императив за Владата. Секој ден тоа го покажуваме. Она што е промена на ментален склоп на правосудството е исто така она што го правиме за да законот важи за сите. Рак рана е корупцијата. Ќе работиме на тоа додека не го откорениме“, рече Заев одговарајќи на прашање од Ѓорчев кој обвини дека Македонија има драстично лоши позиции на овие полиња.
Лошите проекти довеле на падот на БДП, смета Заев, кој рече дека очекува подобри позиции во вториот квартал. Планираниот раст од 3,2%, ќе биде постигнат, смета премиерот. Во делот на иновативност, Заев рече дека прв пат во Македонија домашните компании добиваат помош.
„Сите фирми кои ги исполнуваат условите имаат право да учествуваат“, рече Заев кој го поздрави фирмите кои се повлекле пријавите бидејќи удел имал носител на власт.
Ѓорчев ја обвини власта дека најмалку родени деца има од кога дошла новата власт.
„Никогаш не се родени помалку деца, Министерството за труд и социјална политика нема абер да понуди проекти. Во 2019 година ќе биде повторно намален бројот и тоа на 20.000 бебиња“ рече Ѓорчев.
Ѓорчев го праша Заев дали ако паднеме за 10 места на листата од „дуинг бизнис“ листата, ќе ги разреши Тевдовски и Анѓушев.
„Кризата влијае на резултатите. Не го разрешивме Никола Груевски кога Македонија падна за 80 места. Јас очекувам раст, тоа е разликата“, одговори Заев.