Поранешниот пакистански премиер Наваз Шариф и неговата ќерка Марјам, двајцата осудени поради корупција, денеска треба да пристигнат во Пакистан, а неговите следбеници најавија марш до аеродромот, на кој треба да слета Шариф.
Властите ангажираа повеќе од 10.000 полицајци пред враќањето на осудениот поранешен премиер и планирана е блокада на патиштата со огромни контејнери за пратки, како и блокада на влезот на градот Лахор.
Шариф се враќа од Велика Британија, недела дена по судскиот процес против него, во кој е осуден на 10 години затвор додека неговата ќерка е осудена на затворска казна од седум години.
Тие двајца беа во Лондон во посета на сопругата на Шариф, која е тешко болна, а пакистанскиот суд ги осуди во отсуство.
Судот наведе дека тој и неговото семејство не го навеле потеклото на парите за купување на луксузни недвижности во Лондон и не ги пријавиле на даночните власти.
Се очекува Шариф да ја обжали пресудата и дека ќе побара да излезе на слобода со кауција.
На Шариф му е забрането да учествува во политика. Неговиот брат Шахбаз Шариф сега ја води партијата Муслиманска лига на Пакистан и ќе излезе на избори на 25 јули.