Фондот за здравствено осигурување одлучи да ги покрие трошоците за лекување на малата Нина на која во Германија и беше извршена хируршка интервенција. На Нина во Дизелдорф ѝ беше дијагностицирано ретко генетско невродегенеративно заболување со што завршила како итен случај на тамошната детската клиника. Болничките трошоци во Германија, каде се лекувала, биле пресметани на околу 50 илјади евра.
Фондот на семејството на Нина ќе му издаде двојазичен образец кој е неопходен за да се регулираат трошоците кон германскиот фонд за извршените интервенции според принципот на договорот за реципрочно лекување меѓу двете држави, објавува „Утрински весник“.
– Ни го одобрија двојазичниот образец со одредени исклучоци за кои се надеваме дека нема да ни направат проблеми во натамошната постапка – со солзи во очите велат родителите на малото девојче за „Утрински весник“.