Премиерот на Република Македонија, Зоран Заев, по средбата со британската премиерка Тереза Меј изјави дека можното решение за името е целосно, во сите сегменти, а не парцијално, во одделни. Но, сепак, во двете земји следуваат консултации за начинот на спроведување на решението.
– Доколку не се најде решение за името, тоа нема да значи дестабилизација во земјата, како што се шпекулира во јавноста. Довербата меѓу Грција и Македонија е изградена и продолжува јакнењето на пријателството, рече Заев.
Премиерот Заев ѝ се заблагодари на премиерката Тереза Меј за поддршката која Велика Британија ја дава за интегрирањето на Македонија во ЕУ и се надева дека 25 годишното пријателство ќе продолжи и понатаму.
– Со случајот Скрипал, потврдивме дека сме добри партнери со Велика Британија и се надеваме дека таквиот однос ќе продолжи. И затоа, овозможете ни ја интеграцијата во ЕУ, ја заслуживме, ѝ рече Заев на Меј.
Виктор Јованов