Во организација на општина Дебар, образовните институции и граѓанскиот сектор денеска со повеќе активности беше одбележан Денот на Европа-9 Мај.
Одбележувањето почна со мини маратон на кој учествуваа четириесетина ученици од Гимназијата „Здравко Чочковски“, а прв на целта стигна Ујкан Муча, ученик од трета година од оваа образовна установа.
Во големата спортска сала, која е изградена со средства на ЕУ, учениците од гимназијата цртаа пејсажи за Европа. Присутните ги поздрави и за значењето на празникот и за стремежот да станеме дел од европското семејство зборуваше претседателот на Советот на општината, Башким Машкули.
– Ви го честитам Денот на Европа во која ние живееме, но тежнееме како општество да бидеме дел од европското семејство. Илјадници наши сограѓани живеат и работат во некоја од западноевропските земји, што значи дека дел од нашиот град е во ЕУ. Со нашето залагање во целина, оптимисти сме дека набрзо нашите стремежи ќе се остварат, рече Машкули.
Во рамки на одбележувањето ќе се одржи и турнир во мал фудбал, со учество на шест екипи, по една од трите основни општински училишта, една екипа на Гимназијата, општината и Полициската станица.