По најавата на еврокомесарот Јоханес Хан дека Македонија и Грција може да постигнат решение за спорот за името во наредните 15 дена, на денешната заедничка прес-конференција со Лорд Џорџ Робертсон, премиерот Зоран Заев изјави оти не верува дека за две недели може да се реши овој спор.
– Еврокомесарот Јоханес Хан е голем пријател на Македонија и дај Боже тој да има информација што за две недели би завршиле. Јас тоа го посакувам, но верувам дека не е можно затоа што утре имаме средба помеѓу двајцата министри за надворешни работи. Знам од прилика како ќе се разговара и до каде очекуваме да завршиме. Генерално тоа што јас го очекувам е да направиме максимални напори до одлуката на Советот на Европската унија затоа што сигурни сме дека ако имаме решение дотогаш, покрај тоа што заслужуваме, ќе добиеме дефинитивни и најсилни гаранции оти ќе добиеме датум за преговори, рече Заев.
Премиерот посочи дека поканата за НАТО се добива автоматски по решението за спорот за името, но тој верува дека две недели се премалку за решавање.
Поранешниот генерален секретар на НАТО лорд Џорџ Робертсон, истакна дека останува на Македонија и нејзиното раководство, на Владата, на премиерот, на опозицијата, на претседателот, како и на луѓето самите да донесат одлуки.
Виктор Јованов