Волонтерите на здружението „Кумановски акцијаши“, заедно со вработените во јавното претпријатие „Чистота и Зеленило“, денеска го уредуваа просторот околу основното училиште „Кочо Рацин“ во Куманово по повод 22 април, Денот на планетата Земја и три години од постоењето на ова здружение.
– Преку социјалните мрежи со лични пораки поканив единаесет здруженија кои декларативно, за жал, велат дека се загрижени за состојбата на животната средина во Куманово, но еве веќе во континуитет од 25-ти февруари годинава постојано ги каниме на нашите акции, но ги нема, изјави Јусуф Љатифи, претседател на „Кумановски акцијаши“.
Здружението најавува уште 43 акции на различни локации во градот.
Директорот на „Чистота и Зеленило“, Сашо Петрушевски информира дека овој период се садат садници на повеќе локации во градот. Претходниот месец се насадени околу 600 нови садници. Стручните служби секојдневно прават проценки за обнова на нови засади на јавни површини или уредување на веќе постоечките.
– Насочени сме и кон косење на тревните површини опфатени во програмата и вон програма на претпријатието, изјави Петрушевски.
Наредната акција е планирано да се одржи веќе наредната сабота, на 28-ми.