Не предвидовме колку е здробена државата, финансиски урнисана и душмански ограбена, па затоа не успеавме да реализираме некои од предвидените проекти, рече премиерот Зоран Заев од собраниската говорница на седницата за интерпелација на Владата. Тој додаде дека власта останува и нема да се жали.
„Не сакаме да земаме кредити од стотици илјади, па со тоа да расте долгот, од кој што е вратен еден процент. Ние сме во време на враќање на огромни долгови. 280 милиони евра за ‘Скопје 2014’, 60 милиони евра за здравството, 50 милиони евра во Министерството за внатрешни работи, 30 милиони евра во Министерството за одбрана и така натаму“, рече Заев.
Премиерот во одговор на пратеникот од ВМРО-ДПМНЕ Крсто Јовановски за отпуштените вработени во државни институции, тврди дека сè што прават е законски, а отпуштени се само работници кои биле со договор на дело. Заев пропустот го гледа кај претходната власт, велејќи дека таа требала да им даде решенија за вработувања.
К. Ландов