Дваесет и шестгодишниот Димче Ашталкоски од Струга прв упеа да доплива до чесниот крст што владиката дебарско-кичевски Тимотеј денеска на православниот празник Богојавление – Водици го фрли во осветените води на реката Црн Дрим.
– Првпат скокам по светиот крст, и ете, успеав да го извадам од водите на Дрим. Прекрасно е чувството и посакувам секој кој скока по крстот да успее да го фати. Исполнет сум со среќа, а подарокот е здравјето и радоста. Најголемата причина што скокнав по светиот крст беше сонот што го сонував пред две седмици, каде на ден Водици скокам во водите на Дрим по светиот крст, рече Ашталкоски.
Во студените води на реката денеска влегоа околу 200 капачи. Дел од нив првпат скокаа од чаршискиот мост, а за еден дел овој ритуал претставува традиција со години наназад.
Во организација на двајцата кумови на годинешната манифестација Богојавление-Водици во Струга, Перо Петкоски и Ѓоко Илоски и црквата „Свети Ѓорѓија“ веднаш по осветувањето на водите се славеше крштевањето на Исус Христос кај Параклисот на „Света Богородица“, а потоа беше организиран и традиционалниот ручек во хотелот „Београд“.
