Во Прилеп ќе се гради „Информатички центар за опоравување од катастрофи и обезбедување на континуитет со работата“, финансиран преку ИПА – претпристапната програма за помош на Европската Унија за 2013 година, за потребите на Министерството за внатрешни работи (МВР). За таа цел деновиве започна расчистување и оградување со жичена ограда на парцела во близина на прилепската касарна „Мирче Ацев“.
МВР ги отфрли како неточни и лажни информациите што се појавија во јавноста дека, наводно во Прилеп се гради центар за мигранти.
– Овој Информатички центар ќе обезбеди континуитет со работата и зачувувањето на податоците во случај на можни природни или катастрофи предизвикани од човечки фактор, информираат од МВР.
Вкупната вредност на овој проект, финансиран од ИПА претпристапната програма за помош на Европската Унија за 2013 година е 3. 398 473 евра, чии градежни работи се почнати од 15 март и треба да завршат до 15 ноември оваа година.
Договорот, како што посочуваат од МВР, е потпишан помеѓу Секторот за централно финансирање и склучување на договори при Министерството за финансии и избраната компанија согласно критериумите на ЕУ.
– Како имплементатор на овој проект во тендерската постапка за избор на најповолен понудувач беше избрана фирмата „4А-М СХПК“ од Република Албанија, информираат од МВР.