Денеска, по завршувањето на судењето во предметот „Поткуп“ премиерот, Зоран Заев, одговараше на новинарски прашања од кои едно се однесуваше на трошоците и високите сметки кои ги плаќаат министерствата.
„Не знам дали имате пиено кафе во Владата, но тоа оди на сметка на Заев или на Анѓушев. Земјоделците што ги собира Љупчо Николовски, за секоја група има кафе и вода, тоа е на сметка на министерот, тој го потпишува тоа“, рече Заев.
Премиерот додаде дека истото се однесува и за сметката на министерот Крешник Бекташи.
„Тие се тие сметки и убаво е ПР секторот кој ги објавува, да ги каже деталите за да биде на чисто кои се сметките од бифеата кои ги плаќаат министрите. Секое кафе, го потпишува одговорното лице во институцијата“, истакна премиерот.
Овие реакции следуваат по информациите објавени во алатката што ја претстави Владата, каде што се прикажани трошоците кои ги прават владините функционери. Притоа се покажа дека кај министерот за култура, Роберт Алаѓозовски, најголеми се трошоците во однос на услугите во мензите, рестораните и бифеата, каде потрошил 421.554 денари од вкупно 547.970 по три основи (во надворешни угостителски објекти, угостителски објекти во странство и угостителски услуги преку мензи, ресторани и бифеа во рамките на институциите).