Здружението на пациенти со хередитарен ангиоедем ХАЕ Македонија ќе реализира ХАЕ караван – серија предавања за медицински лица во неколку градови во државата.
Првото предавање ќе се одржи денеска во општинската сала во Домот на културата во Пробиштип. Во рамки на овој проект ќе бидат опфатени и Штип, Прилеп, Куманово, Охрид и Скопје.
Предавањата ќе ги одржи проф. д-р Весна Гривчева Пановска, а целта е да се подигне свеста за оваа ретка болест особено меѓу лекарите од примарната здравствена заштита за да може да ја препознаат кај потенцијалните пациенти, како и начините на кои може да им се помогне на пациентите.
ХАЕ е ретко заболување кое што настанува поради недостиг на крвниот протеин Ц1 инхибитор и се манифестира со отекување на делови на телото. Овие отоци, доколку се јават на одредени витални органи (како на пример грло, лице, абдомен, дишни органи), може да доведат до животно загрозувачки состојби. Во Македонија има две достапни современи терапии за ова заболување.