Во интервју за „Евроњуз“, специјалниот претставник на Обединетите Нации во спорот за името, Метју Нимиц изјави дека не е јасно какви ќе бидат условите за решавање на спорот во Македонија и Грција во иднина, пренесуваaт грчките медиуми.
„Не мислам дека времето тече во наша полза. Ситуацијата се менува, владите се менуваат. Не знаеме што ќе се случува во Грција за две години. Не знаеме што ќе биде ни со Владата во Скопје. Може да се случат настани кои ќе ја отежнат ситуацијата и ќе направат во иднина уште потешко да се пронајде решение“, вели Нимиц во интервјуто говорејќи кое би било најлошото сценарио доколку дојде до одолговлекување на преговорите.
Тој истакна дека преговорите помеѓу двете земји се концентрирани на името на Македонија, а не на прашањето за идентитетот на македонскиот народ и изрази надеж дека е возможно да се пронајде решение што ќе ги задоволи и двете страни.
Нимиц е категоричен дека во Македонија и Грција постои добра волја за постигнување на согласност за некои важни аспекти на спорот.