Во кривичниот суд утре треба да почне од почеток судењето за случајот со насилството пред Општина Центар, во кое првообвинет е експремиерот Никола Груевски, заедно со Миле Јанакиески, Даниела Рангелова и десетина други лица… Според новиот распоред на претседателот на судот, Иван Џолев, предметот ќе го суди судијата Душан Јосифов од Основниот суд Скопје 1. Јосифов го доби предметот од Татјана Михајлова, а со распоредот на Џолев од месецов суди прекршоци во бараките во Градскиот парк во Скопје.
Името на судијата Јосифов низ медиумите почна да се споменува во 2013 година, кога, како истражен судија правел увид на местото каде што загина новинарот Никола Младенов, сопственикот на неделникот „Фокус“. Медиумите пишуваа дека тој предвреме го напуштил увидот, дека не се снашол во увидот и дека тоа му бил прв случај на којшто работел. Во бомбите на СДСМ можеше да се чуе разговор на ексминистерката Гордана Јанкуловска и порпаролот во МВР, Иво Котевски, во кој на судијата му предвидуваат дека ќе суди прекршоци бидејќи не се снашол како истражен судија во предметот. СДСМ објави и пораки од комуникација на Јанкулоска и Груевски, во која ексминистерката го информира поранешниот премиер дека судијата не се снаоѓа најдобро во увидот.
Во предметот на СЈО, „Насилство“, четвртообвинетиот Томислав Лазаров и петообвинетиот Јордан Ристевски признаа вина и добија условни казни, а за обвинетиот Димче Крстев се води издвоена постапка. Останатите 11 обвинети се изјаснија дека не се виновни.
В. Маглешов