Селекторот на македонската фудбалска репрезентација до 19 години, Вујадин Станојковиќ е оптимист пред стартот на натпреварите за пласман на ЕП 2019.
Македонија е во елитната група каде ќе игра со Англија, Унгарија и Летонија во обид да обезбеди учество на континенталното првенство.
– Групата е силна, но можеме да се надигруваме со сите, впрочем, тоа го потврдивме со пласманот во Елитната фаза и трите победи против Белгија, Швајцарија и Лихтенштајн. Мислам дека и нашата публика ќе има можност да ужива во натпреварите, ќе играме на домашен терен, за тоа се изборивме и мораме да бидеме задоволни, вели Станојковиќ.
Квалификациите во сите групи мора да завршат до 20 мај, а само најдобрите од сите седум групи ќе бидат дел од завршницата на Европското првенство кое ќе биде во Финска, од 16 до 29 јули.