Утре во Атина ќе престојува вицепремиерот за европски прашања, Бујар Османи каде што е предвидено да се сретне со шефот на грчката дипломатија Никос Коѕијас и со алтернативниот министер за надворешни работи, Јоргос Катругалос.
– Министерот за надворешни работи Никос Коѕијас, во вторник на 9 јануари ќе му приреди работен ручек на вицепремиерот на Поранешната југословенска Република Македонија, одговорен за односите со ЕУ, Бујар Османи, по повод неговата посета. Разговорите ќе се фокусираат на европски прашања од заеднички интерес. Господинот Османи, исто така, ќе се сретне со алтернативниот министер за надворешни работи, Јоргос Катругалос, соопштуваат од грчкото МНР.
Утрешната посета на Османи во Атина според грчките медиуми е прва точка од јануарските предвидени активности околу прашањето со името, пред посетата на генералниот секретар на НАТО на Македонија, новата рунда преговори со Нимиц и евентуалната средба на македонскиот и грчкиот премиер на маргините на Светскиот економски форум во Давос.