Полициски службеници на тетовската Полициска станица за безбедност на патниот сообраќај во координација и содејство со повеќе инспекциски служби во следните дваесеттина дена ќе се ангажираат на расчистување на јавните сообраќајни површини во Тетово од самоволни узурпации за трговски, угостителски и други цели и намени информираше портпаролот наСВР Тетово Марјан Јосифовски. Глобите за ваквите узурпации изнесуваат 300 евра во денарска противвредност за физички, 2.000 евра за правни лица и плус 600 евра за нивните одговорни лица.
– Ќе се отстрануваат и соодветно ќе се санкционираат незаконски поставените тезги за продажба на земјоделски, конфекциски и други производи, но и другите видови узурпации а со цел да се овозможи непречено и безбедно движење на возилата и пешаците. На сите оние кои веќе ги узурпирале сообраќајните површини ќе им се изготвуваат адекватни поднесоци. Активностите најпрво се планира да стартуваат на и околу тетовскиот плоштад по што со истите ќе бидат опфатени и улиците „120“, „Илинденска“, „Видоја Смилевски-Бато“, „Борис Кидрич“ и други, изјави Јосифовски.
Од полицијата очекуваат дека со овие активности ќе се придонесе за поголем ред и безбедност на тетовските улици и тротоари во пресрет на доаѓањето на времено вработените во странство со што вообичаено се зголемува вкупната сообраќајна фрекфренција на тетовското и поширокото полошко подрачје.