Кумановската полиција до Основното јавно обвинителство поднесе кривична пријава против тројца кумановци за разбојништво сторено во маркет во Куманово на 3-ти овој месец.
Министерството за внатрешни работи соопшти дека кривична пријава е поднесена против лицата Љ.П. (24), М.А.(18) и Д.Е (18), сите од Куманово, поради постоење основи на сомнение дека сториле кривично дело „разбојништво” од Кривичниот Законик на Република Македонија.
На 3-ти овој месец во 18.30 часот во маркет „Елида” на ул. „Страшко Симонов“ во Куманово, Љ.П. со закана со пиштол извршил разбојништво над вработената, при што го одзел дневниот промет од 19.500 денари. Другите две лица, М.А. и Д.Е. со патничко возило „БМВ“ со кумановски регистарски ознаки го чекале Љ.П. пред маркетот. Откако го извршил разбојништвото, сите заедно побегнале од местото. Настанот во Полициската станица Куманово, го пријавила С.Н. (38) од Куманово – одговорно лице во маркетот.
По овластување од јавен обвинител, извршен е увид и започната е потрага по сторителот и неговите помагачи. По преземените мерки, истиот ден во просториите на СВР Куманово биле приведени Љ.П., М.А. и Д.Е..
Од страна на судија на претходна постапка на пријавените им e одредена мерка притвор во траење од по 30 дена.