Мојот татко не е терорист, горда сум на него и на моето презиме, изјави Зорица Чавкова, ќерката на поранешниот директор на Бирото за јавна бебедност, Митко Чавков, кој се наоѓа во притвор.
„Мојот татко не е терорист, се бореше за безбедноста на државата. Не се терористи ниту Борис Дамовски, ниту Игор Дурловски , ниту Богдан Илиески, ниту останатите притворени. Ја сретнав мајката на Борис Дамовски во затворот во Шутка, не знае ни дали е добар, не ѝ дозволија ни да му ги достави најнеопходните работи“, рече Чавкова.
Таа рече дека таа и нејзините најблиски и семејствата на другите притворени ќе се борат секој ден за, како што рече, цел свет да дознае како се третираат нашите патриоти.
„Мојот татко Митко Чавков и останатите немаат ништо сторено, освен што се виновни бидејќи ја сакаа Македонија. Се гордеам со моето презиме, со мојот татко и не се срамам. Единствено што најдоа во нашиот дом беа телефонот и службениот пиштол. Зарем тоа е најголемиот доказ за да докажат дека е терорист. Зарем телефоните на кој било од приведените се најопасното оружје и доказ за да ги третираат како терористи?“, праша Чавкова од протестот пред Влада.
К.Л.