Кривичниот совет во Основниот суд Скопје 1 прифати дел од жалбите на Основното јавно обвинителство за гонење на организиран криминал и корупција и за тројца обвинети за упадот во Собранието на 27 април на кои им беше определен куќен притвор, го преиначи решението и им определи затворски притвор.
„Кривичниот совет постапувајќи по жалби поднесени од ОЈО за гонење организиран криминал и корупција, донесе решение со кое ги уважи жалбите на обвинителството и решенијата на судија на претходна постапка ги преиначи на начин што уважен е предлогот на ОЈО за гонење организиран криминал и корупција за определување мерка притвор и против осомничените М.П., Г.Ѓ. и Е.Д.Б., определена е мерка притвор во траење од 30 дена“, соопшти Судот.
Од таму наведуваат дека во однос на останатите жалби поднесени од странките против решенијата на судија на претходна постапка, откако ќе се произнесе Кривичниот совет и ќе бидат изготвени решенијата, јавноста ќе биде дополнително известена.
Кривичниот суд определи куќен притвор за вкупно 6 лица кои се товарат за терористичко загрозување на уставниот поредок и безбедноста во врска со настаните на 27 април во Собранието. Меѓу нив се актерот Владо Јовановски и Борис Дамовски.
На 16 лица, пак, им определи затворски притвор од 30 дена.
Под истрага за терористичко загрозување на уставниот поредок и безбедноста се вкупно 36 лица.