Во 1990 година ВМРО-ДПМНЕ почна да го реализира македонскиот сон за независна држава, период кога дел од домашната политичка елита не беше ни подготвен за новото време. Но, како и секојпат, партијата одново го зеде товарот на својот грб. Импулсот за воскреснување на македонската единствена патриотска мисла за самостојна држава дојде од делувањето на идеологот на современото ВМРО Драган Богдановски, но и на многу други.
Ова беше истакнато на денешното доделување благодарници за пратениците од ВМРО-ДПМНЕ, членови на првиот парламентарен состав, што го организира партиската Унија на млади сили (УМС).
– Вие бевте дел од една битка, битката на ВМРО-ДПМНЕ. Делувавте во историско време. Вие сте реперот за секоја парламентарна група. Горди сме што сме ваши идеолошки наследници. Вие и требате на Македонија, ни требате нам младите, му требате на ВМРО-ДПМНЕ со вашата мудрост и непоколебливост, рече претседателот на УМС Диме Спасов, заблагодарвајќи им на сопартијците, членови на првиот собраниски состав, кои, додаде, ја испишуваа историјата во моменти на големи одлуки, предизвици и неизвесности.
Првите парламентарни избори во 1990 година го покажаа, потенцира Спасов, судирот на двата концепта. Уште во предизборната кампања ВМРО-ДПМНЕ се соочи со разни обвинувања и етикирања, па дури и со барање за нејзино бришење од судскиот регистар само зашто потсетуваше дека и се ближи крајот на Југославија. На митинзите првпат отворено се зборуваше дека „нашата сила е во идеите на светлите синови на македонската револуција, на Гоце и Даме, да се создаде независна македонска држава во која никој друг не ќе може да командува освен македонскиот народ“.
– Како младо национално ткиво, пратениците на ВМРО-ДПМНЕ гледаа во секоја предлог одлука, предлог-закон да го изнудат најдоброто за татковината, паралелно справувајќи се со искуството на манипулациите на политичките неистомисленици, рече Спасов.
На денешен ден, 8 јануари 1991 година се конституира новиот парламентарен состав со кој претседаваше највозрасниот пратеник Никола Стојановски од Велес. Следниот ден, на 9 јануари, пратеничката група на ВМРО-ДПМНЕ ги предложи декларацијата за независност на Македонија, како и одлуката за прекинување на плаќање на посебен данок на ЈНА. Триумфот на ВМРО-ДПМНЕ, како што посочи претседателот на УМС, ќе го одбележи 25 јануари 1991 година кога Собранието на РМ ќе ја усови Декларацијата за сувереност на државата.