Легендарниот американски велосипедист Ленс Армстронг наводно е подготвен да признае дека користел недозволени средства кои, меѓу другото, му помогнале во освојувањето на седумте трофеи во низа на Тур д Франс. На Армстронг лани во октомври му беа одземени сите седум титули освоени на Тур д Франс. Според американски медиуми, 41-годишниот Армстронг им соопштил на американските анти-допинг органи дека ќе ѝ се обрати на јавноста во обраќање во кое ќе ја признае својата вина. Тој негов потег наводно е мотивиран од желбата да добие дозвола да се натпреварува во триатлоните, кои ја заменија неговата љубов кон велосипедизмот.
Повеќе од една деценија Американецот остро ги негираше сите обвиненија за допинг. Тоа беше случај дури и минатиот октомври кога од анти-допинг агенцијата на САД го обвинија дека користел најсофистициран и најуспешен допинг-програм виден до сега во светот на спортот. Сите резултати на Армстронг од 1 август 1998 до крајот на неговата кариера беа избришани, меѓу кои и седумте Тур д Франс титули во низа освоени од 1999 до 2005 година. Покрај тоа на Армстронг му беше изречена доживотна забрана за занимавање со велосипедизам.