Градоначалникот на општина Центар, Саша Богдановиќ, денеска го прими уверението за избор на градоначалник од Општинската изборна комисија.
Уверенија добија и новоизбраните советници, 16 од коалицијата предводена од СДСМ и 7 од коалицијата предводена од ВМРО-ДПМНЕ.
Саша Богдановиќ имаше примопредавање и средба со досегашниот градоначалник, Андреј Жерновски.
Богдановиќ им се заблагодари на сите досегашни советници и им го честиташе изборот на новоизбраните.
„Му се заблагодарувам и на мојот пријател, Андреј Жерновски. Ќе разменуваме искуства за да ги продолжиме сите отпочнати процеси во општина Центар. По долго време, имавме фер и демократски избори. Се сеќаваме како се одвиваа изборите во 2013-та, но и тогаш граѓаните успеаа да се изборат за вистинската опција. Вољата на граѓаните никој не може да ја оспори“, изјави Богдановиќ.
Андреј Жерновски, досегашниот градоначалник, рече дека пред 4 години, кога ја преземал функцијата никој не го пречекал, но од утредента веќе редовно доаѓале инспекции.
„Машината е запалена, сега треба да се продолжи она што се работеше. Петнаесеттина проекти се веќе почнати и документацијата е завршена за нив. Центарци на овие избори го добија она што го заслужуваат, Саша е избран во првиот круг. Тука сум за соработка и совети“, изјави Жерновски.
Богдановиќ најави дека една од првите работи со што ќе се зафати е ревизија на „Скопје 2014“.