Владата на Република Македонија одлучи официјално да ја поддржи иницијативата за основање Меѓународен институт на Југоисточна Европа за одржливи технологии со мисија „Наука за мир”, кој ќе работи според моделот ЦЕРН.
Министерката за образование и наука Рената Дескоска денеска во Женева ја потпиша Декларацијата за намери за основање на институтот, проект кој е единствен од ваков вид во регионот и поддржан од Обединетите нации, УНЕСКО и од Европската организација за нуклеарни истражувања-ЦЕРН.
– Според министерката Дескоска, главна цел на проектот е да се промовира соработката меѓу науката, технологијата и индустријата, односно да биде платформа за едукација на талентирани млади луѓе и инженери врз основа на трансфер на знаење и технологии од европските центри и лаборатории, а проектот ќе овозможи и вработување на научници и експерти од земјите коишто ќе бидат вклучени во него, соопшти Министерството за образование и наука.
Институтот ќе биде базиран на најновите технологии, а би овозможил научна и технолошка соработка, трансфер на знаење, промоција, зајакнување на иновациите, размена на информации, човечки ресурси и обуки.
МОН посочува дека конкретниот идејно-научен концепт за институтот е веќе разработен и подразбира изградба на синхротрон (тип на кружен акцелератор) кој ќе овозможи истражување од различни области како што се биологија, биомедицина, хемија, фармакологија, екологија, геологија и инженеринг, со широка примена во разни индустрии.