Зоран Ангелов, носител на листата со кандидати за членови гостиварскиот општински совет од редовите на СДСМ, денеска на прес конфренција од градскиот плоштад ги повика гостиварци да излезат во недела на гласање, за, како што рече, граѓаните да добијат слободна, услужна и развиена општина каде што ќе живеат и работат квалитетно.
Тој истакна дека промената мора да стане целосна и оти сега е момент, освен централната власт, граѓаните да ги освојат и своите општини.
– Одлучете се за живот во Гостивар за сите, така како што се одлучивте за живот во Македонија. Со пенкало во рака, без поделби, со кренати глави, сплотени, мирно и достоинствено – одиме на уште една демократска победа. Сега е моментот кога мораме да ја заокружиме промената кон подобра и просперитетна Македонија, повика Ангелов.
Во Гостивар коалицијата која ја предводи СДСМ, нема кандидат за градоначалник и на овие избори настапува само со листа на кандидати за членови на совет.