Кандидатот за градоначалник на Штип од СДСМ Благој Бочварски денеска на прес-конференција во штипската приградска населба Балканска најави дека по промената на локалната власт во првите сто дена жителите ќе добијат квалитетна вода за пиење од штипската филтер-станица.
– Населените места Чардалкија, Балканска и Македонка во моментов немаат здрава вода за пиење. Новата водоводна линија од препумпната станица Баби до овие населби на граѓаните ќе им обезбеди чиста и здрава вода за пиење. Веднаш по промената на локалната власт, во првите 100 дена, Балканска ќе добие вода за пиење. Во првата фаза се планира изградба на транзитна линија до населба Балканска во должина од 1.500 метри и секундарни водоводни краци низ населбата. Во втората фаза транзитна линија до населба Чардаклија и крак за работна зона Македонка. Во трета фаза крак за населба Македонка, рече Бочварски.
Тој истакна дека со реализацијата на овој проект над 2000 граѓани на овие населени места ќе добијат чиста и здрава вода за пиење, а водоснабдувањето на индустриската зона на поранешниот комбинат „Македонка“ ќе се реши трајно и граѓаните, како што рече, нема да бидат изложени на ризик од заразни болести.