ЗНМ и Владата се договорија за декриминализација на клеветата. Според договореното, казните за новинарите ќе бидат до 2.000 евра, за уредниците до 10.000 евра а за сопственикот на медиумот до 15.000 евра.
Владата и ЗНМ долг период не можеа да се договорат токму околу висината на максималните казни.
Новинарите бараа и се залагаа за тоа висината на казната да биде во висина на две до три новинарски плати, но и да се намали прагот на казната, која првично од страна на власта се бараше да биде 10.000 евра за уредниците и близу 100.000 за сопствениците на медиуми.
„Законот е поставен казните да бидат на крај. Воспоставен е систем кој му дава можност на новинарот да ја докаже вистината на напишаното, ако во тоа не успее, да се извини, а има инструмент да се објави и демант. Крајна мерка ќе биде изрекување мерка надомест за нематеријална штета, рече претседателот на ЗНМ, кој додаде дека ова е еден важен чекор за подобрување на состојбите во медиумите.
Вицепремиерката Теута Арифи, која претседава со работната група за медиуми оцени дека овој договор покажува оти може да се разговара за сите прашања, ако целта е постигнување повисоки демократски вредности во општеството. Таа изрази верување дека постигнатиот договор ќе биде позитивно оценет и од страна на ЕУ.