Позитивната атмосфера може да биде само предност на двете страни и верувам дека во соодветен момент ќе се создадат услови да направиме чекор понатаму, а тоа е да разгледуваме варијанти на можни решенија на проблемот, изјави премиерот Зоран Заев, одговарајќи на новинарско прашање за впечатоците од вчерашната средба со грчкиот министер за надворешни работи Никос Коѕијас.
– Јас сум позитивен и од самата средба и од работите како се случуваат со севкупното соседство, така и со Република Грција. Веќе има позитивен амбиент, има пријателство, дијалог и разговори, а двете средби на двајцата министри во Атина и Скопје го потврдија тоа, изјави Заев при денешанат посета на Арачиново по повод муслиманскиот празник Курбан Бајрам.
Посочи дека го повикал медијаторот Метју Нимиц, некаде во ноември, декември или јануари, кога ќе мисли дека е соодветно да излезе со можни алтернативни решенија.
– Намерата ни е заедно со опозицијата да го решаваме ова прашање, заради тоа што е интерес на сите граѓани на Република Македонија. И владејачките и опозициските партии заедно во функција да најдеме решение, а не да се одложува проблемот помеѓу Република Македонија и Република Грција. Долги години Македонија чека пред вратите на НАТО, Македонија конечно треба да направи чекор и да стане полноправна членка на НАТО и да отпочне преговори со ЕУ, изјави Заев.
