„Општинскиот комитет на ВМРО-Народна партија од Тетово упатува остра реакција до министерот за Здравство, г-динот Таравари по повод непочитувањето на Охридскиот рамковен договор.
Ако во договорот стои дека основно начело е правичната застапеност тогаш Тетово е пример за класично избегнување на основните принципи од Охридскиот рамковен договор, кога се во прашање Македонците.
Имено, почитуван министре Ве прашуваме, зошто во Клиничка болница, Здравствен дом, Завод за здравствена заштита и Фондот за здравство немате назначено барем еден директор – Македонец во овие институции?
Доколку Тетово е мултиетнички град, тогаш се прашуваме, дали Вие знаете дека тука живеат Македонци и дали со ваков однос придонесувате за непочитување кон нив?
Воедно на крајот постои уште едно прашање кое не става во дилема, зошто цело ова време молчат општинските комитети на двете најголеми партии од македонскиот блок?“ се вели во соопштението на ВМРО-НП Тетово.