СДСМ соопшти дека во недостиг од идеи ВМРО-ДПМНЕ продолжува да шири лаги со цел да создаде страв и вознемиреност меѓу граѓаните.
Со тенденциозното ширење на лажни вести за наводно трајно населување на десетици илјади мигранти и нивно вработување, посочуваат од СДСМ, ВМРО-ДПМНЕ очајно се обидува да ги сокрие последиците од 11-годишното криминално владеење на централно и локално ниво.
– Граѓаните да бидат спокојни. Македонија е декларирана како држава за транзит на бегалци, а со усвојувањето на Стратегијата се почитуваат меѓународните стандарди и Конвенцијата за правата на бегалци од 1994 година што Македонија ја има ратификувано. Предлог Стратегијата за интеграција на бегалци и странци 2017-2027 со која што денес ВМРО-ДПМНЕ ги плаши граѓаните е само продолжение на иста таква стратегија за периодот 2009–2015 година, донесена од тогашната Влада предводена токму од ВМРО-ДПМНЕ, истакнуваат од СДСМ.
Од партијата посочуваат дека станува збор за документ што служи како патоказ и нема обврзувачки акти кон кое било министерство или институција.
– Граѓаните ги препознаваат манипулациите на ВМРО-ДПМНЕ и затоа избраа нова Влада предводена од СДСМ и реформи што носат живот за сите. Токму поради политиките на продуцирање поделби, насилство и конфликти, ВМРО-ДПМНЕ загуби на парламентарните избори и ќе загуби и на претстојните локални избори, по што општините ќе добијат нови, одговорни и чесни локални власти предводени од СДСМ и коалицијата што ќе работат во интерес на граѓаните, стои во соопштението.