„Оливер Спасовски покажа колку не се грижи за граѓаните. Тој вчера наместо да работи на случајот кој ги вознемири граѓаните на Љуботен, но и целокупната македонска јавност со вандалскиот чин со уништување на гробиштата во ова село, си водеше политика и тераше тесно партиска агенда.
Граѓаните и вчера не слушнаа дали и што презело МВР во насока на откривање на сторителите на сквернавењето на 30-тина православни гробови, што предизвика гнев и тензии меѓу населението.
Народот е вознемирен и чека одговор на прашањето кому му сметаат православните гробишта.
Со секој ден поминат на слобода, вандалите се охрабруваат дека имаат поддршка од власта во тоа што го прават, а граѓаните стануваат се позагрижени дека нема кој да ги брани. Оливер Спасовски зема плата од граѓаните и не смее да го игнорира нивниот револт и загриженост
МВР на чело со Спасовски наместо сторителите да ги изведе пред лицето на правдата и да спречи повторување на делото, времето го троши на работи кои се сведуваат на рубрика од жолтиот печат.
Со оваа своја постапка Спасовски покажа дека нема намера да го води Министерството како сервис на граѓаните и да го штити редот и мирот на државата. Со оваа своја постапка МВР покажа дека се претворило во институција која спроведува партиски хирови наместо да брка сторители на криминал.
Со оваа своја постапка само се засилува стравот дека чинот во Љуботен е осмислен акт со цел да се предизвика тензија која треба да ја дефокусира јавноста од политичките потези на власта во наредниот период а кои се од сериозно значење за идентитетот и опстојувањето на државата и народот“, изјави Дејан Митровски.