Создадени се услови за унапредување и развој на соработката на полето на економијата меѓу Република Македонија и Државата Израел, оценето е на средбата вечерва во Владата на премиерот Зоран Заев со израелска бизнис делегација, којашто ја предводи поранешниот висок функционер во Владата на Израел, Силван Шалом.
Како што соопшти владината прес-служба, тема на разговорот беше можноста за инвестиции во Македонија. Изразен е интерес од страна на израелските бизнисмени за инвестирање во нашата држава. Констатирано е дека се создадени услови за унапредување и развој на соработката на полето на економијата, по демократските промени што се случија во Македонија.
– Владата на Република Македонија води политики на отворени можности за граѓаните и за Македонија. Преку реформскиот процес за којшто се определивме, ја градиме Македонија во стабилна, правна држава, во којашто законите ќе важат подеднакво за сите и ќе ја штитат правдата, без разлика дали станува збор за граѓани или правни субјекти, компании, претпријатија кои работат во земјава. Нашата цел е да ја осигураме егзистенцијата на граѓаните, но исто така да обезбедиме клима на сигурност кај сегашните и потенцијалните домашни и странски инвеститори, коишто можат значително да придонесат во потребниот економски развој на нашата држава, рече премиерот Заев.
Израелската бизнис делегација е во Македонија со цел да ги разгледа условите и придобивките од Прграмата на новата Влада за инвестирање во земјава, како и областите во коишто има потреба и простор за тоа.
Како што стои во соопштението, со бизнисмените од Израел е поранешниот вицепремиер на Израел и поранешен министер за внатрешни работи, Силван Шалом, кој е во државава како пријател на Република Македонија, кој сака да и помогне на Македонија во поттикот на странски инвестиции и економскиот развој.