Претседателот на ВМРО-ДПМНЕ Никола Груевски, денеска и утре претстојува во дводневна работна посета на Брисел, каде главен настан е конференција за Западен Балкан што во организација на Европската народна партија (ЕПП) се одржува во Европскиот парламент.
Како што јавува дописникот на МИА од Брисел, покрај учеството на оваа конференција, каде е најавено присуство на голем број на видни политичари од Европа, Груевски денеска е предвидено да се сретне и со Јозеф Дол, челникот на ЕПП, која е најсилна политичка партија во Европа и чија асоцијативна членка е ВМРО-ДПМНЕ.
Поранешниот премиер на Република Македонија, кој во Брисел е придружуван од меѓународниот секретар на партијата Александар Николоски и од членот на Извршниот комитет и поранешен министер за надворешни работи, Никола Попоски, во текот на утрешниот ден, пак, има набиена агенда на билатерални средби со голем број на европратеници, а предвидено е и да се сретне со еврокомесарот за преговори за проширување Јоханес Хан. Тема на разговорите е состојбата во Македонија и евро-атлантските аспирации на земјата, односно како најбројната партија во Европарламентот може да и помогне на македонската држава за да напредува во овој процес.