Почувствувајте го вкусот на Медитеранот со денешниот вкусен ручек …
Потребно е:
5 поголеми пилешки копани
8-10 ливчиња свежа жалфија
2-3 гранчиња свеж темјан
2-3 гранчиња свеж рузмарин
1 морков
3 помали главици црвен кромид
5 чешниња лук
1 пакување смрзната медитеранска мешавина
маслиново масло
сол, бибер
мелен сув зачин
250 мл пилешка супа
200 мл бело вино
200 мл сок од домати
Подготовка:
– Копаните измијте ги и исушете ги. Под кожата на секој копан пикнете листови жалфија. Месото од сите страни премачкајте го со маслиново масло и посипете со сол и мелен бибер.
– Во тава за печење наредете ги батаците и ставете ги во загреана рерна на 200 целзиусови степени малку да се запечат околу 15 минути.
– За тоа време помешајте ги сокот од домати и виното.
– Извадете ја тавата со копаните од рерна, тргнете ги копаните и во тавата ставете ја медитеранската мешавина, ситно сецканиот лук, на ливчиња сецканиот кромид и на тркалца исечениот морков.
– Вратете ги копаните во тавата, сипете ја супата и мешавината од сок од домати и вино. Посолете и зачинете со мелен сув зачин.
– Преку батаците наредете ги гранчињата темјан и рузмарин и вратете ја тавата во рерна да се допечат батаците уште 45 минути, односно додека не омекнат копаните и зеленчукот. Послужете ги топли.