Пратеникот на ВМРО-ДПМНЕ, Антонијо Милошоски, рече дека лидерот на СДСМ, Зоран Заев е под притисок да спроведе редефинирање на државата и затоа сака да ги замолчи пратениците.
– Заев е уценет од нарко-мафијашки структури, кои му помагаа во изборите. Повикот за нелегитимен избор на претседател е повик за конфликт, тензии и државен удар. Од ударот кој се обидува очајнички да го изврши Заев, ќе патат само граѓаните, рече Милошоски.
Тој повторно повика на избори и кажа дека странците немале право да се мешаат за тоа дали во Македонија треба или не треба да има предвремени парламентарни избори заедно со локалните.
– Зоран Заев ја држи Македонија во криза. Нема доблест да прифати предвремени парламентарни избори, заедно со локалните. Тој е толку уценет и уплашен, што е спремен да оди на се или ништо. Тој како човек кој бил аболициран не треба да се надева на втора аболиција, рече Милошоски.
На новинарско прашање, зошто лидерот на ДПМНЕ, Никола Груевски, не ја држи прес конференцијата, тој кажа дека смета дека е доволно, на Заев да му се одговори на ова ниво.