Американскиот архитект Ендрју Бромберг кој работи во фирмата „Аедас“, основана во Хонг Конг, проектирал зграда која ќе се најде во рамки на комплексот China World Trade Center во Пекинг.
Ексклузивниот шопинг центар ќе се гради во Пекинг, во градскиот деловен кварт Чаојанг. Зградата е специфична поради необичниот елипсест кров со парк, градина, шеталиште и патека која во зима ќе биде покриена со вештачки снег и ќе стане место за санкање.
Проектот моментално е во петтата и последна фаза на мастерпланот на кој се работи веќе 30 години.
Во оваа зграда ќе се наоѓаат разни изложбени и галериски простории, продавници, ресторани, кафулиња, како и разни деловни простории, апартмани. Зградата исто така е наменета за поврзување на моменталната и идната линија на подземната железница.
