Во Македонија денеска ќе пристигне седмата ротација од 25 припадници на полицијата од Република Словачка кои заедно со македонската полиција ќе спроведуваат патролни активности на македонско-грчката граница со цел превенција во областа на јавната безбедност и неовластено преминување на државната граница.
Словачката полициска единица ќе биде распоредена во областа на Дојранското Езеро, а е соодветно опремена со теренски возила, термални камери и уреди за ноќно гледање.
Мандатот на словачката полициска мисија ќе биде 30 дена со можност за продолжување.
Врз основа на потпишаниот Меморандум за разбирање меѓу министерствата за внатрешни работи на Македонија и на Словачка, досега во земјава се испратени 175 полициски службеници од Словачка почнувајќи од март 2016 година.