Не е морално што денеска и со узурпирање на говорницата и со зборување за Теута Арифи, која не е пратеник, ниту кандидат за член во Комисијата за избори и менување да се опструира седницата, рече Џеват Адеми од ДУИ.
Обраќајќи му се на Илија Димовски, кој претходно рече дека Арифи не направила ништо за Тетово, Адеми кажа дека е добро што тој не се кандидирал за градоначалник, бидејќи ВМРО-ДПМНЕ не направило ништо за Тетово.
– Ни самите не си верувате во тезите. За доброто на држава и граѓаните дајте да ја прекинеме оваа комедија, веќе имаме кандидат за претседател на Собранието. Лоше е и во очите на јавноста да бидеме комедијанти, рече Адеми.
Тој кажа дека единствен проблем за коалиција помеѓу ВМРО-ДПМНЕ и ДУИ било Специјалното јавно обвинителство.
Според Илија Димовски, Теута Арифи треба да се спомене во разговорите во парламентот, бидејќи таа била предводник на тимот кој преговарал со СДСМ.
– Предуслов беше законот за јазици и тој некаде постои. Дајте да го видиме тој текст, не само заради нашите пратеници, туку заради сите во Република Македонија, рече Димовски.