Претседателот на Собранието на Република Македонија Трајко Вељаноски од лично, но и од име на пратениците упати честитки до членовите на Светиот Архиерејски Синод на Македонската Православна Црква – Охридска Архиепископија, како и на сите православни верници во земјата и во странство по повод големиот христијански празник Св. Климент Охридски.
– Со оддавањето почит и празнување на големиот христијански празник посветен на Свети Климент Охридски, го уважуваме целокупното негово црковно, просветно и книжевно творештво. Како најистакнат ученик на Светите браќа Кирил и Методиј ја создаде Охридската архиепископија и кирилското писмо кои се непроценлив дар за македонската национална и црковна историја, но неговата делотворна работа продолжи и кон другите нации во светот каде остави длабоки траги, се вели во честитката.
Претседателот на Собранието Вељаноски во честитката повика денешниот христијански празник да претставува поттик за меѓусебно разбирање и промовирање на воспоставената традиција на заедничко почитување и помагање.
– Само на таков начин Република Македонија гради иднина во која ќе се применуваат универзалните вредности и цивилизациски придобивки на христијанството и на човештвото, се подвлекува во честитката од Вељаноски по повод христијански празник Св. Климент Охридски.