Претседателот на Република Македонија Ѓорге Иванов денеска и утре ќе учествува на 4. Регионален претседателски самит во Будва на тема „Соработка кон напредок – предизвици и одговори“.
Целта на овој традиционален собир, чиј домаќин е претседателот на Црна Гора Филип Вујановиќ, е одржување на политичкиот дијалог на највисоко ниво меѓу соседните земји во рамки на зедничката евроатлантска перспектива.
ЕУ и НАТО интеграциите и теми кои треба да ги олеснат овие процеси: јакнење на демократските и реформските процеси, зголемена економска соработка и поттикнување на регионални инвестиции, инфраструктурно и енергетско поврзување, прекугранична соработка во борбата против криминалот итн., ќе бидат областите за дискусија на овој Самит.
На 4. Регионален претседателски самит најавено е присуство на претседателите на Република Албанија, Бамир Топи и на Република Косово, Атифете Јахјага.
Првата средба од ваков вид се одржа во Валона, Република Албанија во 2009 година, а втората во Призрен, Република Косово во 2010 година. Во 2011 година домаќин на Регионалната лидерска средба беше претседателот Иванов, а средбата се одржа во Охрид.