Српскиот интернационалец Урош Лучиќ и македонскиот младински репрезентативец Андреј Цветковски повеќе не се членови на МЗТ Скопје, откако спогодбено ја прекинаа соработката со клубот од Аеродром.
Двајцата изминатото лето дојдоа, односно се вратија во сино-белиот тим, но откако не се изборија за посакуваната минутажа побараа да си заминат и среќата да ја пробаат во друга средина.
Лучиќ, кој во АБА-лигата настапи на осум средби со просек од 7,8 поени и 2,5 скока, а во Еврокупот на три меча просечно реализираше по 10,3 поени, кариерата најверојатно ќе ја продолжи во Романија каде што настапуваше во минатата сезона.
Цветковски, пак, кој во АБА-лигата шанса доби на еден меч, а во Еврокупот на две средби со вкупно постигнати седум поени, во продолжение од сезоната ќе настапува за гевгелиски Кожув, каде што со оглед на конкуренцијата сигурно ќе има поголема минутажа, а со тоа и шанса за напредок.
– Управата на МЗТ Скопје Аеродром на двајцата играчи им се заблагодарува на тоа што досега вложиле во клубот и им посакува се најдобро во понатамошната кариера, соопштија од таборот на македонскиот шампион.