Здравството не е иделано, има и ќе има многу проблеми и предизвици, но секогаш кога го оценувате правете го низ призма на споредба – какво било и какво е сега. Немаме најдобар здравствен систем, но тој постојано се развива и, согласно со мудра стратегија, се инвестира еднакво во сите негови столбови – во инфраструктура, опрема и во човечки капацитети, рече министерот за здравство Никола Тодоров на денешната панел-дискусија на ВМРО-ДПМНЕ на тема „За здрав живот“.
Набројувајќи ги новините во здравствената политика, го посочи проектот „Мој термин“ и праша дали во минатото пациентот можел во точно одреден термин да оди на лекар. Посочи дека според анкетите, 70 проценти меѓу пациентите и меѓу вработените во здравството се задоволни од таа реформа.
Ги спомна и отворањето на државната кардиохирургија, детската кардиохирургија, новата болница во Козле, постојаната едукација на доктори во странство, набавените компјутерски томографи, магнентни резонанци и ангиографи низ целата држава, набавката на амбулантни возила за итна помош…
Во 2005 година, рече тој, пациентите биле приморани да чекаат и да умираат или, оние што имале пари – да одат во соседни земји. За интервентна кардиологија, рече Тодоров, пред десет години се чекало од шест до осум месеци, а на Онкологија пациентите со тешки малигни болести чекале една година зрачна терапија за која денес се чека три подготвителни дена.
На панел-дискусијата „За здрав живот“ учествуваа и директори на клиники и болници и претставници од министерствата за здравство и за животна средина и просторно планирање.