„ВМРО-ДПМНЕ наместо да поттикнува дебати и решенија од младинските организации за иселувањето на младите, за невработеноста на младите, за нивниот квалитет на живот, тие се занимаваат со рушење на секој обид на младите да влијаат на политиките, како во Македонија, така сега и во меѓународни рамки.
Преку Агенцијата за млади и спорт (АМС) се обидуваат на нерегуларен и нетранспарентен начин да го изберат младинскиот претставник во Управниот одбор на Младинската канцеларија за соработка на младите за Западен Балкан (RYCO).
Социјалдемократската младина на Македонија бара веднаш да престане обидот на ВМРО-ДПМНЕ преку АМС, за инсталирање на “свој човек” во ова тело.
Младите сами ќе ги бираат своите претставници. Тоа нема да го прави ниту ВМРО-ДПМНЕ, ниту било која партија. Од ова отстапки нема!
RYCO не е СПУКМ па да се бираат претставници по принципот “некое ливче нека снема” или со интервенција на полициски сили.
Младите заслужуваат вистински свои претставници, а не нечии гласници.
Генерациите кои зрачат со отвореност, борбеност, искреност, идеи, демократичност и транспарентност, на крајот ќе победат! Наскоро, младинската креативност, непреченото младинско здружување и размената на идеи, ќе станат составен дел од младинските политики и Груевски тоа не може да го спречи“, се вели во соопштението на СДСМ.