Ставот на пратеничката група на СДСМ во врска законските измени кои се однесуваат на екстерното тестирање, за ВМРО-ДПМНЕ е резултат на нивната немоќ и недостаток на идеи, поради што, како што посочуваат, партијата посегнува по укинување и блокирање позитивни проекти и реформи.
– Пратениците од СДСМ наместо да дојдат на работа и да учестуваат во работата на Собранието и преку корисни дискусии и дебати заедно да ги решаваме проблемите на граѓаните и да ги подобруваме постоечките законски решенија, денес тие повторно прочитаа празно соопштение напишано од Заев и Шекеринска во врска со новините за процесот на екстерното тестирање. Провидно, несериозно и веќе познато губитничко сценарио на СДСМ од кое трпат само граѓаните на Репбулика Македонија, се вели во реакцијата на пратеничката група на ВМРО-ДПМНЕ на прес конференција на пратеникот Васко Ковачевски од СДСМ.
Во неа се додава дека како Пратеничката група на ВМРО-ДПМНЕ и Коалицијата „За подобра Македонија“ цврсто стојат зад проектот „Екстерно оценување“ бидејќи, како што се истакнува во реакцијата, силно веруваат дека тоа значително ќе придонесе за подобрување на квалитетот на основното и средното образование, како и за објективно и реално отсликување и оценување на знаењето кое го стекнале учениците во основните и средните училишта.
– Со измените и дополнувањата на двата закони се воведува дополнителен додаток во кој што ќе се наоѓаат резултатите од екстерното оценување и истите нема да влијаат врз општиот успех на ученикот. Истовремено, се врши промена на започнување на процесот на екстерното оценување кое што наместо од 4-то, ќе започне од 6-то одделение. Се воведува новина со која што ќе се овозможи на Државниот испитен центар да воведе апликација со пробни тестови преку кои учениците ќе може да вежбаат и да се подготвуваат за екстерното оценување. Исто така, со овие измени се предвидуваат и парични награди во износ од 50%, 40% и 30% од просечната нето плата во Македонија за ученици кои што ќе освојат некое од првите три места на меѓународни натпревари, но и за наставниците кои што ги подготвувале учениците за натпреварот, се вели во реакцијата.
Токму затоа, се додава во неа, ние како пратеници ќе продолжиме да се бориме за реализација и спроведуваање на овој проект бидејќи токму објективноста во оценувањето на учениците од страна на професорите беше и сеуште претставува голем проблем во образовниот процес.